آذربایجان میللی مسئله سی و اونون دوشمنلری

بیلیندیگی کیمی میللی مسئله دئدیکده بیر میللتی تمثیل ائده جک بوتون پارامئترلر نظره آلینمالیدیر. بو باخیمدان آذربایجان میللی مسئله سینی اله آلارساق، کئچمیش 81 ایلده کی فارسلیق حاکیمیتی آذربایجان دیل و مدنیتی نین دوشمنی اولاراق اورتایا چیخماغا چالیشمیشدیر. بو دوشمنلیکلر بعضن قودورقانلیق دورومونا چاتاراق 1946 اینجی ایلده گونئی آذربایجاندا آذربایجان میللی حؤکومتی طرفیندن حاضیرلانمیش درسلیک کیتابلاری نین یاندیریلماسی ایله نتیجه لنمیشدیر. آذربایجان شاعیری صمد وورغون بو کیتاب یاندیرمالارا پاریسده ائتدیگی چیخیشیندا آشاغیداکی شعر ایله اؤز موناسیبتینی بیلدیرمیشدیر:

"جلاد!سنین قالاق قالاق یاندیردیغین کیتاب لار                 مین کمالین شهرتی دیر، مین اورگین آرزیسی

بیز کوچوروک بو دونیادان اونلار قالیر یادیگار                      هر ورقه نقش اولونموش، نئچه اینسان دویغوسی

                                     مین کمالین شهرتی دیر، مین اورگین آرزیسی

یاندیردیغین او کیتابلار، آلاولانیر یاخشی باخ!                     او آلاولار شعله  چکیپ شفق  سالیر ظولمته

شاعیرلرین نجیب روحی مزاریندان قالخاراق                    آلقیش دیییر عشقی بویوک بیر قهرمان  میللته

                                      او آلاولار شعله  چکیپ  شفق  سالیر ظولمته!

جلاد!  منیم  دیلیمده دیر  بایاتیلار قوشمالار                 دئه اونلاری هئچ دویدومی سنین او داش اوره گین؟

هر گرایلی  پرده سینده مین آنانین  قلبی وار                   هر شیکسته م اولادی دیر بیرمقدس  دیله یین

                                      دئه اونلاری هئچ دویدومی سنین او داش اوره گین؟

سویله! سن می خور باخیرسان منیم شعر دیلیمه؟              قوجا  شرقین شهرتی دیر فیضولی نین غزلی

سن می «ترک خر» دیییرسن اولوسوما ائلیمه؟                    داهی لره سوت وئرمیشدیر آذربایجان گوزلی

                                       قوجا  شرقین شهرتی دیر فیضولی نین غزلی

جلاد!یانیپ اود اولسا دا کوله دؤنمز آرزیلار                        طبیعتین  آنا  قلبی  قول دوغمامیش اینسانی!

هر اورگین اؤز دونیاسی بیر سعادت آرزیلار                          قانلار ایله   یازیلمیشدیر هر آزادلیق  داستانی

                                  طبیعتین  آنا  قلبی  قول دوغمامیش اینسانی!

ازل باشدان دوشمنی دیر اوزی موردار قارانلیق                 هرتوپراقین اؤز عشقی وار هر میللتین اؤز آدی

کائیناتا دییشمه رم   شهرتیمی    بیر آنلیق                      منم اودلار اؤلکه سینین گونش دونلی اوولادی!

                                      هرتوپراقین اؤزعشقی وار هر میللتین اؤز آدی!

نه دیر او دارآغاجلاری؟دئه! کیملردیر آسیلان؟                 اویونجاق می گلیرسنه وطنی مین حق سسی؟

دایان!دایان!اویاق گزیرهر اورکده بیر آصلان                     بوغازیندان  یاپیشاجاق اونون قادیر پنجه سی

                                   اویونجاق می گلیرسنه وطنی مین حق سسی؟

جلاد!سن می دین قیریرسان فدائیلر نسلینی؟               میللتیمین صاف قانیدیر قورت کیمی ایچدیگین قان

زمان گلیر!...من دویورام اونون آیاق سسینی                    شهید لرین قیام  روحی  یاپیشا جاق یخه نده ن

                               میللتیمین صاف قانیدیر قورت کیمی ایچدیگین قان

بیر واراق لا تاریخ لری! اوتان منیم قارشیمدا                آنام تومروس کسمه دی می کیخسرووون باشینی؟

کور اوغلونون ستارخانین چلنگی وار باشیمدا                  نسیل لریم  قویمایاجاق داش اوستونده  داشینی

                               آنام تومروس کسمه دی می کیخسرووون باشینی؟

سورآتینی! دورت ناللی چاپ! میدان سنیندیر آنجاق              من گوروره م آل گئینیپ  گلن  باهار  فصلینی

قوجاشرقین گونشی دیر یاراندیغیم بوتورپاق                  من   یئتیردیم  آل   بایراقلی   انقلابلار نسلینی

                                      من گوروره م آل گئینیپ  گلن  باهار  فصلینی."(1)

اوسته کی اورک آغریلارینی نظره آلاراق گوئنی آذربایجاندا میللی بیلینجین گلیشمه سی و میللی دیرچه لیشین باشلانماسی نین یانی سیرا آذر آیی نین 26 سی هر ایل گونئی آذربایجانلیلارین درسلیک کیتابلاری نین فارس شوونیستلری و اونون گونئی آذربایجانداکی عامیللری طرفیندن یاندیریلماسی گونو اولاراق عزیزله نه رک بو مدنیت سیزلیگین قارشی سینی آلماق، آذربایجان دیل و مدنیتینه ماراغی آرتیرماق اوچون ایچریده کی آذربایجان میللی فعاللاری بوگونو بیر بیرلرینه و دوستلارینا کیتاب هدیه ائتمگه چالیشمالارینا باخمایاراق فارس راسیستلری و اونلارین آذربایجانداکی اویونجاقلاری آذربایجان میللی حرکتینی دونیا ایجتماعیتینده ایزوله ائتمک و حاکیمیت طرفیندن باسقی آلتینا آلدیرماق اوچون بیلگی سایار (کامپیوتئر) وسیله سی ایله سیموله اولموش خیالاتی عکسلری بعضی اینتئرنئت سیته لری واسیطه سی ایله یایماغا چالیشدیقلارینا تانیق اولوروق. بو آرادا پان ایرانیستلرین قویروغو کیمی تانینمیش و آذربایجان منلیگی و کیملیگی علیهینه آشکارجا ساواش آچمیش پیمان پاکمهر ذات عالی نین ده فارس راسیستلیگی اوچون وئردیگی امک فارس راسیستلری نین تقدیرینه لاییق گؤرونمه لیدیر. ایجنا نیوز آدلی سیته ایسه، مسئولیتسیزجه یایدیغی عکسلری پیمان پاکمهردن اله گتیردیگینی ادعا ائدیر، اوخویوروق:

"ایجنا نیوز/ خبرگزاری جوانان آزادیخواه ایران: آقای پیمان پاکمهر عکسهایی از آتش زدن کتابهای مربوط به فردوسی ، سعدی و همچنین کوروش برای ما ارسال داشته ولی ایشان هیچ گونه اشاره ای به زمان و یا مکان این خبر نکرده است . ایشان در پیغام کوتاهی مدعی شده است که آتش زدن  این کتابها از سوی تجزیه طلبان صورت گرفته است که به احتمال زیاد منظور ایشان از تجزیه طلبان همان استقلال طلبان آذربایجان می باشد."(2)

اوسته گؤروندوگو کیمی ایستر فارس شوونیست قویروغو کیمی تانینمیش غرضلی پیمان پاکمهر، ایسترسه ده اؤزلرینی "ایجنا نیوز/ خبرگزاری جوانان آزادیخواه ایران" آدلاندیران محفلین هدفی آذربایجان میللی مسئله سینی دونیا ایجتماعیتی نین نظریندن یاییندیرماق مقصدی گودور دئیه دوشونمه لی ییک. دئمک، بیر یاندان "ایجنا نیوز" پیمان پاکمهردن آرا آچماغا چالیشدیغینا باخمایاراق باشقا یاندان هئچ بیر فاکتا اساسلانمایان شکیللری یایماقلا اؤزونو باشقا پان ایرانیستلره بنزتمگه چالیشمیش گؤرونور. بو مسئله اوزره آذربایجان میللی و مدنی تشکیلاتلاری داها دریندن دوشونمه لی و ایران دونونا بورونموش موختلیف بویاقلی فارس راسیستلری و فاشیستلری نین تله تاولامالارینا اویمامالاری نین یانی سیرا، آذربایجان ایجتماعیتینی آییق و ساییق اولماغا چاغیرمالیدیرلار. بوگون آذربایجانلیلارین میللی دوشمنلری فارسلارین افسانه لری و کئچمیشده کی ادبیاتچیلاری دئییل، نیظام اینتیظام آلمیش آذربایجان میللی منلیگی و کیملیگینی هدف آلمیش فارس شوونیبستلیگی و راسیستلیگیدیر.

قایناقلار:

1                    صمد وورغون، یاندیریلان کیتابلار، آذربایجان، باکی نشریاتی.

2                    ایجنا نیوز/ خبرگزاری جوانان آزادیخواه ایران: عکسهایی از آتش زدن کتابهای شاهنامه فردوسی و... تاریخ : 29/9/1385 ساعت :22:30: http://www.ijna-ir.com/tazeha/news_2473.htm

ایشیق سؤنمز 22.12.2006