چین-ین اویغوروستان ویلایتینده کی قارشیدورمالاردا ۱۵۶ نفر اؤلوب

چین-ده اویغور تورکلرینین کومپاکت یاشادیغی اورومچی-ده اویغورلارلا چینلیلر آراسیندا باش وئرمیش توققوشمادا ۱۵۶ نفر اؤلوب، ۸۰۰-دن چوخ یارالی وار. چینین “شینهوا” آگئنتلیینین معلوماتینا اساسن، ۵۷ نفر توققوشما باش وئرن زامان ائله کوچه ده جه اؤلوب. دیگرلرینین ایسه خسته خانالاردا حیاتینی ایتیردیگی بیلدیریلیر.

اؤلن و خسارت آلانلارین اکثریتی اویغورلاردیر. اونلارین آراسیندا پلیس امکداشلاری نین دا اولدوغو بیلدیریلیر.

توققوشمالارا ژوئن-ین ۲۵-ده یئرلی فابریکلرین بیرینده چینلیلرله اویغورلار آراسیندا باش قادیران داعوا گؤستریلیر. لاکین چین رسمیلری زوراکیلیغا اویغور نوماییشچیلرین باشلادیغینی ایدیعا ائدیر. اویغورلار ایسه پلیسین دینج اعترازچیلارا اودلو سیلاهدان آتش آچدیغینی دئییرلر. اؤلکهده خاریجی متبواتین ایشله مه سینده ده پروبلئملر یارانیب. موبیل تئفونلا علاقه کسیلیب، اینتئرنئته چیخیش باغلانیب.

اعتیراضلارا ۳ میندن چوخ اویغور قوشولوب و موداخیله ائتمک ایسته ین میندن چوخ پولیسله آرالاریندا توققوشما باش وئریب. نوماییشچیلر ۳۰۰-ه قدر آوتوموبیل، سرنیشین آوتوبوسو، پلیس ماشینلارینی، او جومله دن ۲۰۰-دن آرتیق دوکانی یاندیریبلار.

چین رسمیلری زوراکیلیغا اویغور نوماییشچیلرین باشلادیغینی دئسه ده، اویغورلار پولیسین آکسییا کئچیرن طلبه لره قارشی اودلو سیلاهدان آتش آچدیغینی بیلیدیرلر. چین اویغورلاری جمعیتی نین رهبری ائتکین ائلئمین وئردیگی معلوماتا گؤره، چین پولیسی نوماییشچیلره آتش آچیب: «اویغور تورکلری ایسه کوچه-کوچه چین پلیسی ایله توققوشور. اؤلو سایی نین چوخ اولدوغونو احتیمال ائدیریک».

اؤلو سایی نین چوخ اولماسی نین سببلری ایسه هله کی، آیدین دئییل. یئرلی سینخوا آگئنتلیگی نین معلوماتینا گؤره، حاضیردا اورومچیده وضعیت نزارت آلیتیندادیر. پلیس ۳۰۰ نفری حبس ائدیب. هؤکومت یئنی بیر قاریشدورمانین باش وئررمه مه سی اوچون ۶۰۰ اویغور فهله نی مووققتی سیغیناجاقلارا گؤردریب. اویغور نوماینده لری نین سؤزلرینه گؤره، اعتیراضلارین سببی ژوئن-ین ۲۶-دا قوانقدون ویلایتینده کی اویونجاق فابریکینده چین و اویغور منشالی فهله لر آراسیندا باش وئرن کوتلوی داعوادیر. بئله کی، اعتیراضچیلار همین واخت اؤلن ۲ اویغورون ایشی نین آراشدیریلماسینی طلب ائدیرلر.

پئکن ایسه حادیثه لره گؤره حاضیردا لوندوندا یاشایان و اوللر چین هؤکومتی طرفیندن حبس اولونان کئچمیش ایش آدامی رابییه کادرین رهبرلیک ائتدیگی عومومدونیا اویغور کونقرئسینی گوناهلاندیریر و ایختیشاشلارین خاریجدن ایداره ائدیلدیگینی بیلدیریر. قئید ائدک کی، رسمی رقملره گؤره، اهالیسی ۲۱ میلیون اولان و اکثریتی نین تورک منشالی اولدوغو اویغوروستان موختار ویلایتی چی نین ترکیبیندن آیریلاراق اؤز موسته لیگینی الده ائتمه یه جان آتیر.ans 

بای بک سیته سی